ساكتة ليه!!!!

ساكتة ليه انا مش عارف
قولت اشوفك صاحية ولا خلاص متى
جسيت نبضك لقيتك صاحية مصدقتش
صمتك طال ..بقالك سنين مفتحتيش بقك
وكل كلب بياكل فى لحمك
وانتى حتى مبتتحركيش
شعبك بيصرخ ..شايفاه مبتتكلميش
وجعه ووجعك بيزيد كل يوم
هو يصرخ وانت مبتتألميش
ولادك ضاعوا ..وبرضه ساكتة
فكرهم ضاع وانتى عارفة
يلا بقى قومى ومتعيطيش
اصلى عارف انك شفتى كتير بس والله مش لوحدك
قومى بقى ورجعى بأيدك حياتك

الامتحانات .....وايامها

كم اعشق الامتحانات ..او بالاحرى اوقات الامتحانات
فترة عصيبة وجميلة
مين فينا مبيفتكرش سهر الليالى ايام الامتحانات
مجرد ما افكر فى الايام دى الاقى سيل الذكريات اشتغل
اذاعة القرأن الكريم ...واغانى ام كلثوم
والراديو اللى مبيطفيش و منظر الكتب والملازم ولمة الاصحاب

وساعات التليفون مبيبطلش... ال24 ساعة

ترن ..ترن...ترن..ترن

الو يا ثابت عامل ايه فى المادة .. يقولى مش عارف ..يخوفنى اكتر

وريقى يجرى وانا بقوله يعنى ايه مش عارف؟؟!!!!
يرد بتردد ..تحس ان المادة سهلة وصعبة ...وطويلة اوى.
يادى النيلة عمرك ما فرحتنى دايما متشائم.
يرد عشان يدارى ..لا بس هتخلص بأذن الله.
اسكت للحظة مستمتعا بالتفائل ده .
يقولى فى ثانية ...انا مش عارف احل الشيتات
وخصوصا شيت 3 و 4 و5.
يخرب بيتك دول 6 شيتات اقفل يا كلب.. سلام.

بعديها بشويه اقول اشوف الواد احمد عامل ايه
الو ..ازيك يا احمد عامل ايه ؟ ايه اخبار المادة؟
يرد: مالها !!!!!!! (وكأنه مالوش علاقة بالموضوع)
ارد بكل عصبية : مالها ايه يخرم جيبك .. هى ايه اللى مالها يابو مالها
يرد بكل برود (لدرجة انى بحس ان السماعة تلجة) : بص يا سيدى...
أول ما يقول بص يا سيدى ..اعرف انه كده دخل فى موده الطبيعى
هتلاقى فى امتحانات 2005 سؤال صعب فى ال antenna ...حليته ؟
ارد اقوله لا يا عم انا لسة بذاكر الشباتر..خنقتوونى
لما ابتدى احل ابقى اكلمك....سلام

ايه ده العيال كلها قاعدة بتحل امتحانات ودخلت فى الشيتات وانا عمرى ما حليت شيت واحد لأخره
يا ولاد الكلب.......
ابص لكوم الورق اللى لو اتباع بالكيلو ..يعيشنى اسبوع ملك
وابص للمروحة اللى فوقى .... وابص للارض حوليا كلها ملازم
والقى نظرة اخيرة على المكتب الملىء بالكتب اللى متفتحتش 10 مرات على بعضهم فى السنة
قبل أن اطلق صوت جهورى يهز اركان الحجرة
كوباية ليمون يا ماما ...

اقعد الاعب المادة واجيلها يمين تيجى شمال
طب يرضيكى ..يهديكى..ولا تعبرنى
والله انا بحبك ومصور كل ملازمك...طب استهدى بالله كده
اراضيها ..بألوان الفسفور والبمبة
تبصلى وكأنها بتقولى لسه ناقص حاجة
اقوم وافتح جيب الشنطة واطلع القلم الحبر
تضحك ..امسك فيها مقومش من على المادة الا ساعة اذان الفجر
اصلى وادعى ربنا يكرمنى ويغفرلى اى تقصير.. ويدوبك اناملى ساعتين

مظهر غريب عند اصحابى ساعة الامتحانات انا برضه مختلف عنهم فيه
ومش عارف العيب فيهم ولا ده بروتوكول متبع وانا كنت غايب ساعتها
الحلاقة زلبطة يعنى على الزيرو
العيل من دول اول ميخش شهر واحد او ستة وساعات فى الميدتيرم...
الاقيهم كلهم حالقين ..واللى مربى شعره فيهم بيبقى حالقه على تانى درجة
قال ايه عشان ميهتموش بنفسهم ..حجج فارغة
...انا بقى الفترة دى عمرى ما بقرب للحلاق ..وليا نظريتى
مدام المعلومات بتتخزن فى دماغى ..وشعرى ده جزء من الدماغ
يبقى لو حلقت..اكيد جزء من المعلومات هيطير ..والحمد لله قدرت اقنع بيها عدد لا بأس به من زمايلى
صحيح الواحد بيبقى قاعد طرزان فى البيت
لكن دى معتقدات استحالة احلق ساعة امتحانات

الصبح بقى وانا رايح الامتحان
مجمع اربع تلاف ملزمة فى الشنطة الخضرا معتقد انى هراجعهم كلهم
وغالبا ما ينتهى المترو بملزمتين تلاتة على الاكتر
مظهر المترو الصبح وسبع تلاف طالب وطالبة ماسكين ملازم وبيسمعوا بصوت عالى
كفيل انه يخليك تفقد تركيزك بقية حياتك ....مش يوم الامتحان بس
وده على عكس الايام العادية ..اللى ما عمرى شفت حد ماسك حتى جورنال

اصعب واقسى واحلى واجمل لحظات ايام الامتحانات
ساعة ما المراقب يقول لموا الورق
وطبعا كالعادة بكون فى نص السؤال اللى قبل الاخير
ومفيش مكان فى كراسة الورق اكتب فيه
وهموت واكتب الحل لانى ببقى عارفه
ابص للمراقب بصة اول ما يبتدى يلم الورق
واسمع فى خيالى موسيقى الكاو بويز ..او الطيب والشرس
واسمع ضربات قلبى تتسارع ويبدأ رسمى الكروكى فى الشغل
وغالبا بيبقى رسمة وجنبها شرح طريقة الحل